اليوم العالمي لحموم الإنسان

قبل ما أتهور و أفتح المدونة دي كان بيبقى جوايا كلام كتير جدا .. و عادة ما كنت بأكتبه على ورق لينتهي به المطاف إلى درج مكتبي الصغير اللي على اليمين .. و المدونة كانت الحل علشان كلماتي يبقى ليها صدى في كل حتة .. و هداني ربنا بعد نصيحة غالية من أخت أغلى ودفعتي في الكلية و إللي هيا إنسانة

و ساعتها و في أول بوست ليا قعدت و أصابعي متحفزة على الكيبورد .. فحصل اللي ما كنتش متوقعه .. كنت متوقع ان صوابعي تكتب من نفسها و تجري جري لكن الحقيقة ان حركتها كانت أبطأ .. و ساعتها عرفت بيت القصيد .. و من يومها قررت إني مش حأكتب إلا بصدق و حأعبر عن إللي جوايا مباشرة .. أكيد ده أكبر ضمانة لجريان كلماتي على صفحة الورق

النهاردة 10 ديسمبر

و ماله يعني أهو يوم زي أي يوم

اليوم ده هو اليوم العالمي لحموم الإنسان .. قصدي حقوق الإنسان

الله يمسيك بالخير يا للمبي هههههههههههه

هو أنا قلت حاجة تضحك .. ما تتلم يا جدع بأقولك اليوم العالمي لحقوق الإنسان

و عدمو المؤاخذة .. و أنا مالي .. حتلعب بعيد و ألا أرش عليكو مية

انتهى الحوار عند ذلك مش خوفا من المية و لكن لإحساسي إن الموضوع مش حيجيب نتيجة و فضلت أروح أتمشى في وسط البلد شوية و من مخرج مترو التحرير اللي عند هارديز نحو ميدان طلعت حرب و منه إلى شارع شريف و مع دوراني كان عقلي يدور .. يدور بلا هوادة و بلا رحمة .. ففي هذا اليوم ستقام المحافل و تزدان في أجواء إحتفالية خاصة .. و ربما تقام الولائم و كل هذا إحتفالا باليوم العالمي لحقوق الإنسان .. فما معنى حقوق .. و من هو الإنسان .. هو فيه ناس تانية غيرنا في العالم و لا أحناش عارفين ..

لا أدري إن كان ما حدث مقصودا أم أنه محض صدفة .. ففجأة و بجوار العبد بتاع الجيلاتي إنتبهت على صوت عجيب فإلتفتت فإذا بها صوت صفعات لظابط على وجه شاب صعيدي .. عرفت ذلك من جلبابه و عمته .. شاب يقف بجوار عربته الخشبية و التي تتناثر عليها حبات التين الشوكي و قلتين .. جمع قلة قلة حبنا قللالاه .. و مع دوي الصفعات إنطلق الظابط بصوته الأجش : مش قلتلك أبعد عن الشارع ده يا إبن ................. ، حتوسخ الشارع يا .................

قد يكون المظهر غير حضاري و لكن التعامل معه أكثر ديماجوجية .. ودي أبسط كلمة تعبر عن رد فعل الظابط ..

النهاردة اليوم العالمي لحقوق الإنسان

برضه حيقولي حموم الإنسان

روحت الكلية قبل محاضرة الماستر بتاعتي بشوية و رحت على عم خالد العامل في الكلية أخد منه كالعادة سجادة صلاة علشان الحق اصلي العصر قبل المحاضرة لقيته ماشي فبأقوله

أنا : ايه يا عم خالد انتا مروح و لا ايه .

هو : ايوه كفاية كده النهاردة .. على قد فلوسهم .. على قد الثلاثة جنيه بتوعهم

أنا : ههههههههههههه دايما كدا تحب تهزر يا عم خالد .. لا بس حلوة ملعوبة

هو : إنتا فاكرني بأهزر

و إكتشفت عبر كلماته التالية أن يوميته 3 جنيه .. يعني 90 جنيه في الشهر .. و بعد الخصومات يروح ب 75 ملطوش حق شغله لشهر كامل من 8 صباحا ل 8 مساء .. 75 جنيه هو ما يخرج من ذمة إدارة الكلية .. بلاش الحكومة .. لهذا العامل المسكين رب الأسرة ذو الثلاثة أطفال .. رغم إن مصاريف الطالب عندنا في الاقسام الاجنبية في الكلية 6000 جنيه .. و أنا متأكد من الأصفار كويس مش غلطة كيبورد .. أحنا طبعا قسم عربي بندفع 300 جنيه و في الماستر 1200 جنيه

قلتله .. بصراحة .. ما عرفتش أقوله إيه .. عزيزي القاريء .. لو إنتا مكاني ممكن تقوله إيه ..

ممكن أقوله تحب تسمع إيه .. و تهديها لمين

أنا مش حأعلق على حاجة و حأسيب الكلام ده كله و قدامه علامة إستفهام كبيرة تحط وراها رأيك في إللي بيحصل

ضحكنا على اللمبي لما قال إننا المفروض ندي للأطفال سندويتشات حلاوة بالقشطة في فيلم اللي بالي بالك .. اللمبي رغم الطريقة الساخرة اللي ناقش بيها القضية دي لكن كان فيها عمق .. فأكيد حقوق الانسان بتبتدي من الاطفال اللي لازم نرعاهم و خصوصا اطفال الشوارع .. مش لازم نستنى لما يبقوا مجرمين و بعدين نشوف نعاملهم ازاي و نحترم حقوقهم .. لو اهتمينا بيهم احسن ممكن يطلعوا أنفع لمجتمعنا و لأنفسهم .. فحقوق الانسان بتبتدي من الطفل و ده جزء من اهم حقوق الانسان و ابسطها و هو الحقوق الاجتماعية و الاقتصادية .. فقبل ما نتكلم عن منح الانسان وخصوصا الجماعات المهمشة كالمرأة مثلا الحقوق السياسية و المدنية كالحق في التصويت في الانتخابات مثلا .. فلازم الاول نديلها الحق الاجتماعي في المشاركة و احتلال دورها السليم في المجتمع ..

لازم نحقق حقوق الانسان من القاعدة من البداية علشان نرتقي بيها بعد كده .. فاذا ما كناش قدرنا نحقق للانسان حقه في حياته و سلامة جسده ووضعناه في ظروف من التعذيب و من انتهاك ادميته في حد ذاتها و كرامته و حريته أو منعنا عنه حرية التفكير و الابداع و التعبير عن افكاره و طبعا من غير ما يؤذي حد و مع احترام حدود التعبير و تقاليد و قيم المجتمع اللي عايش فيه .. فكيف نطالب بمنحه مثلا الحق في ترشيح نفسه في المجالس النيابية او الحق في العمل و الملكية و المشاركة السياسية بأي شكل من الأشكال

إن الإنتصار لحقوق الإنسان لن تكون بالنصوص و الديباجات و المواثيق الدولية لحقوق الانسان

بل يجب ترجمة كل هذه النصوص الى واقع

فليكن لكل واحد منا كلمة في يوم كهذا

اليوم العالمي لحقوق الإنسان

و فيه ندعو كل الأمم و الشعوب ..

نحن لا ندعوا مثلا للإفراج عن معتقلي جوانتانامو .. و لكننا ندعو لمحاكمتهم بعد ثلاث سنوات من التعذيب

نحن لا ندعو لاغلاق السجون فهناك من هم أهلها .. و لكن لنمنحهم و لو احساسا بسيطا بآدميتهم

نحن لا نطالب بحقوق سياسية .. فإنها لن تتحقق إلا لو تحققت الحقوق الأبسط ..

الحق في الحياة

الحق في الطعام و الكساء

الحق في التعليم و الرعاية الطبية