الجمعة، 21 مارس 2008

إلى أمي في عيدها .. عيد الأم


الفراق .. أأسف لكل قاريء لهذا البوست ، فأنا أدرك جيدا أن تلك الكلمة تعد بداية غير موفقة و غير طبيعية لبوست يرتبط بيوم غالي سعيد هو يوم الأم .. و لكن لعل من يستهجن بدأي بهذه الكلمة أن يجد في السطور التالية مبررا مناسبا مستساغا


الفراق .. ليس الفراق مجرد كلمة من ستة حروف ا ل ف ر ا ق .. انه شعور مركب صعب .. مذاق مر .. مزيج مؤلم من الألم و الشوق .. وبقدر ما يكون إرتباطك العاطفي بالشخص المفارق لك ، بقدر ما يكون الألم و بقدر ما يضطرم الشوق


فماذا إذا كان ذلك الشخص هو أقرب الناس اليك .. ماذا إذا كان الاكثر ارتباطا بك .. ماذا إذا كنت أنت أصلا جزء منه .. ماذا إذا كان هذا الشخص الذي باعدت الأيام بينكم و خلقت من الأميال حدودا .. ماذا إذا هو هو أمك


هنا يكمن التلاقي بين كلا من الفراق و عيد الأم .. ليصبحا متلازمين ، يستحضر كل منهما الآخر .. بل و ربما يغدو عيد الأم له نكهة الفراق


تحتل أمي - أطال الله عمرها - في نفسي و روحي و حياتي أبعادا شتى ، فلم تكن أبدا بالنسبة لي حبيسة حدود دور الأم ، لقد أخذت تحلق في أبعاد عدة بحسب ما يقتضيه الظرف و ما تفرضه الأحداث ، لتكون الأقرب لي دوما ، أما و أختا و صديقة ، فدائما كنت طفلا بيتيا و ترعرعت على هذا لأكون شابا بيتيا و ربما أكون رجلا بيتيا عقب الزواج إن شاء الله ( هو ده التطور الطبيعي للحاجة الساقعة ) ، ولذلك فليس لي من الأصدقاء الكثير ، أعرف الكثير و أحب كل من يحيط بي و يخلص لي ، و لكن أصدقائي قلة .. وكان أول الأصدقاء و أقربهم هي أمي ، منذ كنت صغيرا و قد إعتدت أن أستفيض بكل ما يجري معي ، كل شيء ، دون تحفظات و دون حدود و دون خطوط حمراء ، فتبدأ الحكايا و أنا معها في المطبخ وهي تحضر وجبة الغذاء أو بتحمر حاجة في الزيت قدام البوتاجاز ، و لا تنتهي إلا بعد أن أغفو في سريري ليكون أخر ماأستقبل في يومي قبلة أمي


كانت أقرأ عينيها ، نعم ، أقرأ عينيها ، أتصفحهما ككتاب مفتوح مخطوط بكلام عربي مبين ، أتقن جيدا ترجمة فحوى عينيها ، فعندما أنظر إلى عينيها كنت أعرف كل شيء ، كانت مقياسي لمدى سعادتها أو حزنها . و كان أقسى عقاب لي حين تغضب من مسلك لي أو لفظ .. أن لا تحادثني .. فصمتها في تلك اللحظات كان كالسياط بل أشد وطأة .. و لكن كانت الصراحة منهجا للتعامل فيما بيننا فقد كانت الشفافية هي الدرب الوحيد أمامنا لكي نحل أي مشكلة


ولكن و منذ افترقنا و سافرت كي استكمل دراستي الجامعية ، منذ خمسة أعوام ، كان شيئا في حياتي و كياني و عالمي قد تغير ، فلم أعد أرى أمي سوى في نهاية العام .. لم أعد أستطيع أن أنقل لها ما يجري معي على الهواء مباشرة ، و لم تكن المكالمات الهاتفية أن توفي بالغرض ، لم يكن الشات اللعين أن يشبع في نفسي رغبة و شعور أن أجلس الى أمي وجهها لوجه .. لا .. بل أن أضع رأسي على صدرها .. أو أن أتوسد قدميها و أنا أسترسل في حديث لا ينقطع بحجة انقطاع الإنترنت أو خلل في المايك أو ... أو أن الرصيد قد نفد


لايدرك أحد قيمة ما يملك إلا عندما يفقده ، احمد الله سبحانه و تعالى أن أمي بخير و بصحة جيدة فذلك من فضله ، أدام الله عليها عليها الصحة و العافية و أطال الله في عمرها وجمعنا على خير . لقد خلق ذلك الإبتعاد المفاجيء عن أمي خلل في توازني لفترة لم تكن بيسيرة ، ولكن مشيئة الله متبوعة بدعاء أمي كان له الفضل في أن أتمكن من التعايش مع هذا الواقع ، ولكن الاميال التي تفصلنا لم تقطع حبائل الاتصال الروحي بيني و بين أمي ، فمازال ذلك الخط الروحي متصلا لا ينقطع ، و مازلت أستقبل منها الاتصال في أحلك ظروفي لتعلله بأنه شعرت أني في مشكلة أو أن قلبها كان حاسس ان فيه حاجة ( سلامة قلبها يا رب ) أو إن عينيها بترف ، ولكن كان اتصالها دوما يأتي في وقته تماما و كأن كل ما يجري معي يتم نقله على الهواء مباشرة على شاشة قلبها الرؤوم



في عيدها اليوم


عيد الأم


أقول لها .. أمي الحبيبة


لا أملك في يوم كهذا غير أن أقول لكي
كل عام و أنتي بخير
أدام الله عليكي الصحة و العافية و السعادة
أراح الله قلبك و أنار دربك
وجمعنا الله على خير .. انه ولي ذلك و القادر عليه
و ... وحشتيني

هناك 22 تعليقًا:

  1. ربنا يجمعكم على الخير والسعادة



    الحمد لله أنها موجودة فما زال في العمر فرصة لبرها والقرب منها



    تحياتي

    ردحذف
  2. مهند
    ♥ ♥ ♥ ♥ ♥
    و انتا طيب يا مهند
    منور المدونة يا برنسسسسسس

    ردحذف
  3. صاحب المضيفة
    ♥ ♥ ♥ ♥ ♥ ♥ ♥
    شكرا يا استاذنا
    بقدر ما كان البعد مؤلم
    بقدر ما كان ليه فضل
    اني اعرف قيمتها
    اني احاول في الكام اسبوع اللي باشوفها فيه في السنة اني ارضيها و ما ازعلهاش
    و ربنا يعينا على اننا نرد و لو جزء بسيط من اللي عملوه لنا

    ردحذف
  4. دعاء الجميلة
    ♥ ♥ ♥ ♥ ♥ ♥ ♥
    منورة طبعا
    و كل سنة و انتي طيبة و مامتك بالف خير و صحة يا دودو
    عارفة
    انا كنت زيك كده
    برضه مش عاطي امي حقها
    وممكن ازعل منها في حاجات و لما كبرت شوية بقيت و بنص كلامك الدقيق و العجيب :
    بانكسف احسسها انها امي
    وممكن في تلفون ليا انكسف اقول ماما
    لكن
    بعد ما بعدت عني بقيت احب كلمة ماما و احب احسسها انها امي و احسس نفسي اولا ان الست دي امي
    ولما تكلمني في التلفون و انا في مجتمع كبير ارد و اقول باعلى صوتي
    ازيك يا ماما
    ربنا يخليلك ماما و ما يبعدكوش عن بعض يا رب ابدا

    خالص تحياتي
    دودو

    ردحذف
  5. عزيزى

    طبعا مهما اى حد ما تكلم عن الام وفضلها مش هيديها حقها

    وربنا يرحم ويصبر امهات الشهداء والمعتقلين والمظلوميين فى هذه الدنيا

    وانت مهما هتحاول فى دنيتك تدى امك حقها مش هتديها ذرة من حقها

    ربنا يخلهالك يارب

    وتكون ليها واهى ليك سند دنيا واخره يارب

    تحياتى

    سلام

    ردحذف
  6. واعرف ان الفترة دى رغم صعوبتها بس هتخليك اقوى وتقدر تعتمد على نفسك من غيرها وتلاقيها هى كمان ارتاحت شوية من طلباتك ربنا يخليهالك ويخليك ليها

    ردحذف
  7. عموما انا قريت في مدونتك من زمان
    بس تعليقي اتلخر
    ربنا يكرمك
    مكنتش اعتقد ان في حد كده بيحب امه الحب ده...مش قصدي انك شخص غريب انك بتحبها كده
    لا لانك اتكلمت باستفاضة عن تعلقك بيها
    في حين ان ناس كتير بتعتقد ان ده قد يمتص من شخصيتك كرجل
    بس اد ايه انت ابرزت تعلقك بها باسلوب غاية في الجمال والثقة
    بحييك
    وربنا يقربك منها
    تفتكر في حد يستحق حبك ده غير امك
    مجرد شخص بيحبك حبه لذاته
    وذ ما قلت قد لانشعر بقيمة وجمال ما نملك الا عندما نفقده
    ارجو دوام الصحة لها ولامي ولامهات المسلمين
    ربنا يرجعك بسلامة
    احييك علي اسلوبك الرائع
    والي بيثبت انك شخص طيب جدا
    ومحترم
    وفيك الخير
    تحياتي

    ردحذف
  8. وبخصوص سؤالك عن تمهيدي ماجستير بتاعي
    انا لو لاحظت بقول في حلوان مش القاهرة
    بص يا سيدي
    انا كنت تجارة خارجية قسم علوم سياسية
    وطلعت الاولي علي قسمي
    للاسف متعينتش
    بس في تمهيدي ماجستير نظام كريدت اور
    خريجة 2007
    وذي ما شفت اني وحش كاسر وطلعت الاولي علي دفعتي
    سعيدة اننا طلعنا زومول
    عموما انا باجي عندكوا المكتبة كتير
    ابقه افرشلي الارض كتب
    تحياتي

    ردحذف
  9. السلم عليكم ورحمة الله وبركاته

    كده يا أحمد خليتنى أبكى
    انا أكتر واحده حاسه باللى بتقولو لانو ماما فى السعودية وانا حاليا هنا مع اخويا

    وحشنى انى أدخل من البيت احس بروحها فيه ومحضرالى الغدا أدخل اعاكس فيها شويه

    وحشنى لما أكون مدايقه وهى اللى تفهمنى من غير ما أـكلم

    وحشنى لحظة ما بحس انو الدنيا كلها سودا احضنها وأبوس ايدها

    وحشنى لما أنام فى حضنها بالليل

    وزعلانه من نفسى اوى لانى مزعلاها منى النهرده

    بس والله غصب عنى انا بقيت على أعصابى اوى من 8 الصبح وانا فى الجامعه
    وارجع 4 ونص أطبخ
    وياريت على كده
    حاسه انى وحيده بقعد طول اليوم لوحدى
    ماحدش يسأل عليا أخويا بيرجع من الشغل تعبان وينام
    حاسه انى مخنوقه
    مش قادره أقولها تعالى بقه كده كفايه

    اللى خايفه منو انى بدأت أتعودت على وحدتى وبدأت أحس انى مش عاوزه ~أكلم حد لدرجة انى ما بقتش برد على التليفون
    سعات كتير اوى بكون عاوزه أخرج ولما بكلم صحابى اللى أقدر أخرج معاهم بلاقى كل واحد مشغول بنفسو

    ماحدش فاكرنى ولا بيسأل عليا
    وكل الناس بتضغط عليا من غير ما أتكلم بيقولو كلامعادى بس انا من جوه بكون عاوزه اصرخ وأقول حراااااااام عليكو كفايه انا مش قادره استحمل ضغط أكتر من كده

    ردحذف
  10. احساس لسه حى
    ♥ ♥ ♥ ♥ ♥ ♥ ♥ ♥
    حقيقي لسه بدري على ما نوفي الام حقها
    و الاب كمان
    ربنا يخلي امهاتنا لينا يا رب و يرحم من ماتوا منهم
    الام دي حاجة كبيرة بشكل
    شكرا لمرورك الكريم

    السيد شبل
    ♥ ♥ ♥ ♥ ♥ ♥
    شكرا لمرورك
    و ربنا يكرمك

    ردحذف
  11. احساس لسه حى
    ♥ ♥ ♥ ♥ ♥ ♥ ♥ ♥
    حقيقي لسه بدري على ما نوفي الام حقها
    و الاب كمان
    ربنا يخلي امهاتنا لينا يا رب و يرحم من ماتوا منهم
    الام دي حاجة كبيرة بشكل
    شكرا لمرورك الكريم

    السيد شبل
    ♥ ♥ ♥ ♥ ♥ ♥
    شكرا لمرورك
    و ربنا يكرمك

    ردحذف
  12. monaliza
    ♥ ♥ ♥ ♥ ♥
    شكرا لمرورك عندي يا موناليزا
    حقيقي البعاد خلى الواحد اكثر اعتمادا على نفسه و خصوصا اني كمان كليتي كانت في القاهرة بعيد عن اقاربي في المنصورة و دا برضه دافع للاعتماد على النفس بدرجة كلية عندك حق
    لكن البعد ما خلانيش اتفطم عن حنان الام او احس اني ماعدتش محتاجه او كده
    لا اول ما باشوفها لازم ادخل في حضنها و انهل من حنانها اللي باحس انه بيزيد مع البعد
    مش زي ما بيقولوا :
    البعيد عن العين بعيد عن القلب
    هههههههههههههه

    ردحذف
  13. maha zein
    ♥ ♥ ♥ ♥ ♥ ♥
    حقيقي سعيد بمرورك الكريم على مدونتي المتواضعة ، المتواضعة زي صاحبها المتواضع اللي اخجله اطراءك و مبالغتك في تقدير مواهبي
    هههههههههههه
    شايفة التواضع هههههههههههههه
    المشكلة
    او نقول مربط الفرس
    اني لما باتكلم باتكلم من قلبي و خصوصا لما يتعلق الموضوع بانسان قريب علي زي ماما كده
    و طبعا ما فيش حد يستحق نفس الدرجة من الحب اللي باحبها لماما لانه فيه درجات اقل فتفوتة تتناسب ناس تانية لكن الام واحدة يا مها لكن الزوجة مثلا ممكن تتكررو تتعوض
    و حتى العيال

    بالنسبة للتمهيدي بقى
    لو بتيجي المكتبة صحيح يبقى لازم اشوفك هناك حتلاقيني قاعد على كنبة سودا من اللي موجودين قدام المكتبة او قاعد فوق عند الرسايل
    مع استاذ حسن و لمياء
    ههههههههههههه
    تنوري طبعا

    ردحذف
  14. ToOoKa
    ♥ ♥ ♥ ♥
    توكا
    ازيك يا غالية
    منورة و الله
    انا عايز اكتب بوست جديد بس كنت مستني مرورك و بكده يبقى كل الغاليين عدو هنا
    انا اسف اذا كنت اثرت في داخلك شجن او ان اكون قد نكأت جرح قديم لم يندمل بعد
    حلوة نكأت دي
    هههههههههههههههههه

    بس حقيقي الحال من بعضه يا توكا بس انتي ممكن يكون الامر صعب حبتين علشان الوحدة اللي حكيتي عنها حقيقي ربنا يعينك لكن لازم يكون ليكي اصحاب حاولي ما تبقيش اسيرة الوحدة دي لانه الوحدة صعبة جربتها سنة كاملة و حقيقي زي ما بتقولي بتخليكي تاخدي على الوحدة و حتى لو تصودف و عشتي مع حد ما تتكلميش معاه
    واخدة على الوحدة بقى
    و دا بيزعل ناس مننا ناس ما بيقدروش ان الوحدة بتعود الواحد انه ما يشكيش همه الا لنفسه
    ربنا معانا يا توكاااااا
    حقيقي ربنا معانااااااااا
    عايز اشوفك في موجة على طول لازم اعملك تأشيرة اقامة علشان تقعدي
    هههههههههههههه

    ردحذف
  15. paranoia,magnetic & dramatic girl
    ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥
    كل دا اسم يا دودو
    حرام خلصتي القلوب اللي عندي
    هههههههههههه
    بس ما خسارة فيكي ، تستاهلي و الله
    ايوه كده
    شوية تفاؤل
    طنش تعش تنتعش
    انا سخسيا سعات كتير اعمل بالحكمة دي اللي سمعتها من سيد قدرة بتاع عربية الفول اللي قدام المدينة الجامعية في بين السرايات جنب جامعة القاهرة اللي ورا جنينة الحيوان بالظبط
    هههههههههههههه
    الراجل ده كان مزاجه فل لحد ما جيه في يوم و علق لوحة كاتب عليها ، اريد زيارة السيد الرئيس محمد حسني مبارك و ماضي باسمه ، سيد قدرة
    و هما 24 ساعة ، و لا شفنا سيد و لا حتى شفناالقدرة ، و واضح انهم خدوه يقابل السيد الرئيس جمال عبد الناصر ، انور السادات ، محمد نجيب ههههههههههههه
    كان دايما يقولي
    طنش تعش تنتعش
    اول ما بطل يطنش شوفي جراله ايه
    فالحكمة دي جميلة و فعالة
    اساليني انا
    ههههههههههههه
    كده لو فتنتي على درج مكتبي الصغير اللي على الشمال ، المكتب اللي مش لاقي مكان في غرفتي فحاطه في غرفة الجلوس

    ساعتها بس
    ممكن افتن على ديسكاتك اللي تحت الهدوم
    ههههههههههههه

    ردحذف
  16. ربنا يديلها الصحة و يكون تقديرنا لامهاتنا طول السنة

    تحياتي

    ردحذف

Related Posts Plugin for WordPress, Blogger...