الخميس، 29 نوفمبر 2007

أنا .. عشرة في المية


أنا عشرة في المية

أيوه
10 %

يعني إيه 10 % ؟
إنتا بتسألني أنا ؟ مش حتصدقني لو قلتلك ما أعرفش !
لكن كل اللي أنا متأكد منه .. إني أنا 10 % .. و الله 10 % .. هما قالولي كده .. و فضلو شهر كامل يعملوني على هذا الأساس
و متأكد كمان إني أصبحت أكره الرقم عشرة و كل مضاعفات الرقم عشرة .. و أكره ذلك الرمز الغبي الذي يشير الى النسبة المئوية و الذي ظل لشهر كامل يقصرني ضمن فئة تبلغ عشرة في المية
فإليك قصة ال 10 % .. بعد الكشف الطبي لدخول الجيش الذي كان في 3 نوفمبر 2007 م و بعد حصولنا - أنا و زملاءي - على الإعفاء النهائي من آداء الخدمة العسكرية .. كان للعميد و قائد المنطقة رأي آخر .. فإختار من وحي الكشوف نسبة معينة من المتقدمين الحاصلين على الإعفاء .. و هي نسبة 10 % .. و التي كان علينا أن ننتظر حتى سماع نتائج التأجيل .. فمن يحصل على تأجيل يحصل تلقائيا على شهادة الإعفاء و من لا يحصل على التأجيل يتم عرضه على للجنة عليا للبت في أمره في حلمية الزيتون بالقاهرة .. أما الباقي .. أو ال 90 % فقد حصلوا على شهادتهم في اليوم التالي اي يوم 7 نوفمبر 2007 م .. و نحن لم نستلم شهادتنا الا اليوم 29 نوفمبر 2007 م و طيلة هذه المدة لم أتوقف عن الذهاب الى منطقة التجنيد في الصباح الباكر لنعود في الثالثة عصرا بشبشب حنين .. و الله ما حصلت خف هههههههههه
و نحن داخلين من البوابة ، يستوقفك عسكري فتستأذنه الدخول فيقول لك بعد النظر في اوراقك .. بوابة خمسة يا أفندي ، إنتا 10 % .. و عندما تدخل تتنقل من ظابط لعسكري .. الجماعة بتوع ال 10 % يقعدوا هنا .. ال 10 % ييجوا بكرة .. إنتا ايه اللي جابك هنا ، مش انتا 10 % .. مش من هنا يا إبني ، إنتا مش واخد بالك إنك 10 % .. أقعد إنتا 10 % .. قف إنتا 10 % .. مش مكسوف من نفسك إنتا 10 % ههههههههه هو ده اللي ناقص
والنهاردة كانت آخر علاقتي بهذه النسبة اللعينة .. ال 10 % يتجمعوا هنا .. أنا حانده اسامي ال 10 % .. ال 10 % استلموا ورقهم .. شهادات ال 10 % جات .. اللي يسمع اسمه من ال 10 % ياخد شهادته و يروح
ال 10 % باي باي
لا 10 % بعد اليوم

هناك 15 تعليقًا:

  1. السلام عليكم

    الحمد لله مكنتش من ال10%

    احنا ناس بنلعب في الامتياز يا استاذ
    90% علي طوال


    المهم انك خرجت علي خير يا اخي

    ولو ان اللي دخلوا الجيش حبوه قوي

    تحياتي لك

    ردحذف
  2. ههههههههههه

    طب اشطة اهوه احسن من قلة الشغل اللى احنا فيها
    :D

    ردحذف

  3. حمدالله على السلامة يا فندم

    المهم تكون نفسيتك مية في المية

    مش مية بتتشرب لا 10%

    يووه مش مقصودة العشرة دي

    قصدي 100 في المية

    بقولك ايه

    مبروك :)

    تحياتي من ماناساس البلد

    ردحذف
  4. مهند
    ----------
    الله يبارك فيك يا اخ مهند صحيح .. قدمت تفسير متميز للعشرة في المية هههه

    انسانة
    ---------------
    الله يبارك فيكي اهو على رايك شغلونا شوية بدل القعدة في البيت ههههههه

    groom
    ----------------
    شفت علشان تصدقني ان موضوع العشرة في المية ده موضوع محير و شنيع هههههه

    ردحذف
  5. ياااااااااااااااااه
    فكرتني والله بايام لما خدت الاعفا
    بس الحمدلله ماكنتش عشره في الميه ولا بتاع

    بس على ايامي تقريبا كانت خمسه في الميه
    مش فاكر بقى
    شكل الزهايمر دخل ولحس نافوخي


    يلا الف مبروك الاعفا
    وعايزين الشربااااااات



    سلاموووووووووووز

    ردحذف
  6. طيب الحمد لله حمدالله على السلامه
    ربنا مايجعلاي 10 تيجي في طريقك تاني
    :D
    اللينك الي كنت طلبته عشان الاغنيه الي في مدونتي و عجباك اهو
    :)
    http://www.6rbtop.com/download.php?song_id=26612&type=au&q=hi
    تحياتي :)

    ردحذف
  7. طيب جدا أول زيارة نلاقي الخبر الجميل ده
    كدة عشرة على عشرة
    مبروك يافندم وربنا ييسر لك باقي امور حياتك

    ردحذف
  8. طيب هل كده نسبة تنك تلبس جيش كبيرة في نسبة 10%

    ردحذف
    الردود
    1. بالعكس النسبة الأكبر إنك تطلع إعفاء بإذن الله :)

      حذف
  9. انا اخدت غير لائق طبيا وبصمت في الهايكستيب ولكن القائد طبعني انا و 5 زملائى نسبة ال10% وقالولنا تعالو يوم 10 ديسمبر 2013
    ايه هو الاجراء اللي بعد كده وهل ممكن ادخل جيش بسبب ال10% مع اني اخدت غير لائق بالقلم الاحمر ومبصم وكمان ماخدتش ال110 جند!!!؟؟؟
    ياريت حد يجاوبني لو سمحتوا ؟؟؟؟؟

    ردحذف
  10. طب يا باشا ال 10% ده بيكون ليه 110 جند ولا لا عشان انا طلعت منهم وما اخدتهاش وخايف اتسوح

    ردحذف
  11. طب يا باشا انا من ال 10 % دول هل بيبقى لينا 110 جند ولا لا لانى ما اخدتش وخايف اتسوح

    ردحذف
  12. طيب سوال بقي عشان انا 10% اخرتها ممكن نخش يعني ولا خلاص كدا اعفاء بس مع شوية مرمطة

    ردحذف
    الردود
    1. إطمن غالبا باذن اللع هتاخد اعفاء بعد شوية مرمطة :)

      حذف

Related Posts Plugin for WordPress, Blogger...