الثلاثاء، 5 فبراير 2008

تاجين في الراس .. أكيد توجع


هذا التاج هو ثاني تاج أحله ، وبصراحة لم يتم تمريره ليا لكن إتشنكلت فيه أو إتحشكلت أو إتعطرست .. أحنا بنحضر عفاريت و لا إيه الحكاية .. أحنا بنحل التاج و لا بنخفيه هههههههه
أنا من الآخر رايح بحسن نية و ربنا ، أعلق على حل التاج ده عند أختي العزيزة
آية في مدونة : بلا نيلة .. أيامنا سابقا
لقيتها بتمرر التاج لأول خمسة يدخلوا عندها علقوا أو ما علقوش وبما إني مبخت من يومي كنت الزائر المحظوظ رقم خمسة اللي بدل ما يكسب الجايزة الكبرى رحلة لميدان لبنان و لا حاجة هههههه
لقى قدامه هذا التاج الفظيع المريع الشنيع

شكرا يا آية على كل حال .. شكرا

بلا نيلة .. أيامنا سابقا
ههههههههههههه
وبما إن التاج عن مجلس الشعب وكنوع من الثقافة البرلمانية الواجبة علينا كعضو في مجلس الشعب أو خريج علوم سياسية سابق ففيه أسئلة حبيت يكون الرد عليها ذو منهاجية علمية شوية من واقع اللائحة الداخلية لمجلس الشعب المصري .
وطبعا مش محتاج أفكركم إني كعضو في المجلس معايا حصانة .. يعني ضهرنا إنحي .. يعني ما نتهددش .. يعني لا بنخاف و لا من كش .. لا مخبرين و لا كمين .. أحنا ما بنباتش في تخشيبة و لا حتى عملنا ألف مصيبة .. ولو عندي تلاتين قضية .. يوسف بيه يروحني بالعربية
وربنا يسترها معانا يا رب ..

دخلت مجلس الشعب من أوسع أبوابه ، إيه هو رمزك الإنتخابي المفضل ؟

الطاجن .. أيوه الطاجن .. لأنه أول حاجة عملتها أول ما رحت القاهرة علشان أدرس في كلية الاقتصاد و العلوم السياسية كانت إني دخلت مطعم حكاية زمان اللي في شارع فيصل وكلت طاجن مكرونة باللحمة المفرومة ، و اذا دخلت المجلس فدي حتبقى هيا الانطلاقة الحقيقية لمستقبلي السياسي ههههههههههه

كنت تفضل الدخول مستقل او تتبع حزب معين ؟
طبعا أفضل أدخل مستقل علشان أكون محايد ، ما يحركنيش إلا عقلي ومعتقداتي و بس ، وأقدر أواجه أي موضوع داخل المجلس باستقلالية في الرأي و الفكر و الممارسة

اذا دخلت مستقل هل توافق على التوقيع للحزب الوطنى بعد نجاحك كمستقل ؟
طبعا لا ، لثلاث أسباب ، الرابع إني لازم احترم أصوات الجماهير الشعبية التي حملتني الى أروقة مجلس الشعب إحدى غرفتي التشريع في البرلمان المصري ، طبعا ده بافتراض إني دخلت أصلا مستقل

أول حاجه هتعملها لنفسك ولاسرتك ؟
أول حاجة أعملها لنفسي إني ألزق في الكرسي بلزقة إنجليزي يعني ما أطلعش منه إلا لما البرلمان يبقى بيلمان بإذن المولى
علشان أقدر أخدم أسرتي أكتر و أخدم دايرتي كمان .

إيه المشروع اللي ناوى تعمله لاهل دايرتك ؟
طبعا المشاريع لازم تنبع من احتياجات الدائرة ذاتها وتترتب بحسب أولويات الدائرة ، أولا لا بأس من تطوير الخدمات الأساسية زي الكهرباء و المية و التلفونات و شبكة المحمول وتطوير قطاع المواصلات في الدائرة من القاهرة إلى الدائرة و العكس ودي كانت مشكلتي أيام دراستي في الكلية في القاهرة ودلوقتي في حالة الشغل ..أنا عارف إن المشاكل دي عايزة رئيس وزراء مش نايب في مجلس الشعب لكن حأحاول على قد ما أقدر هيا أصوات الناس الطيبة قليلة عندي
شفتوا .. صدق نفسه ههههههههه

دون ذكر اسم الدائرة قعدت في المجلس جنب نائب مميز ، من هو النائب ؟
بصراحة أحب أقعد جنب السيد الدكتور فتحي سرور رئيس المجلس علشان أعد أنا قبل ما يقول أغلبية بعد أي قرار
أنا عارف إن العتب على النظر يا بيه
سلامة عيونك يا أبو سرور

قدمت سؤال للحكومة إيه هو السؤال ؟
كنوع من الثقافة البرلمانية الواجبة علينا كعضو في مجلس الشعب أو خريج علوم سياسية سابق ، لكل نائب أن يوجه إلى ممثلي الحكومة أسئلة للاستفهام عن أمور غامضة لديه أو للتحقق من واقعة أو من أمر تعتزمه الحكومة ، وفق ما تحدده اللائحة من شروط وإجراءات في المواد بين ( المادة 180 – والمادة 193 ) .
و السؤال الذي سأقدمه للحكومة ممثلة في شخص رئيس الوزراء أحمد نظيف هو ، هل الحكومة المصرية لسه فاكرة انها ،

الحكومة .. المصرية
ولا هيا حكومة بلد تانية
ولا فيه شعب غيرنا هنا
اتقي الله فينا و انتا بتقرأ بيان الحكومة


طلب إحاطة موضوعه إيه ؟ وبتقدمه لمين ؟
لكل عضو أن يطلب إحاطة ممثلي الحكومة بأمر له أهمية عامة و عاجلة ، ويكون ضمن اختصاص من يوجه إليه وفق الإجراءات والشروط التي تحددها مواد اللائحة 194 ، 195 ، 197 .
و أنا من هنا أطلب إحاطة ممثلي الحكومة كل في مكانه عن اللي بيحصل .. وراكوا حاجة الأول و لا فاضيين ...
خطط الغاء التموين و الدعم ، خطط رفع رسوم الجامعات الحكومية ، خطط رفع اسعار البنزين و المازوت ومصادر الطاقة ، خطط بيع مصر في خطوات خصخصة غير محسوبة ، إنعدام أمان المواطن المصري أما سلطة الأمان الرئيسية وهي الشرطة ، خطة التوريث في مصر ، خطة الاحتكار لسلع استراتيجية زي الحديد و الاسمنت ومضاعفة اسعارهم ، خطط القضاء على الزراعة في مصر وبدلا من صرف الفلوس عليها رايحين نعمل مشروعات فاشلة واستثمارات في غير محلها زي توشكا و مدينتي و مدينة الصفوة و الرحاب المدن اللي هدفها مش المواطن المصري الطبيعي باي حال و اكيد المستفيد منها هو ناس تانية غيرنا ، الوساطة و المحسوبية

استجواب لاتنين من الوزراء ، تستجوب مين ، و موضوعه إيه ؟؟؟؟
لكل عضو حق توجيه استجواب إلى ممثلي الحكومة بهدف المحاسبة في الشؤون التي تدخل في اختصاص من يوجه إليه هذا الاستجواب ، ويشترط لقبول الاستجواب أن يؤيده عشرة نواب على الأقل ومرفقا به مذكرة شارحة تتضمن الوقائع والأسباب ووجه المخالفة ومايراه المستجوب من أسانيد وفق ما نصت عليه اللائحة ( المواد من 199 – 207 ) .
و أتمنى حينها أن أوجه استجوابين إلى كل من :
الأول : طبعا وزير الداخلية اللواء حبيب العادلي و يكون موضوعه بالتأكيد تجاوزات الضباط في مراكز الشرطة من ترويع المواطنين و التعذيب و التحول من صمام أمان لحماية المواطنين إلى حماية ناس تانية .
و الثاني الى وزير الزراعة بسبب ما يحدث من انعدام في التنظيم في هذا القطاع و الفساد الذي أدى الى فساد المحاصيل الاستراتيجية كالقمح و القطن و انتقال الأمراض عبر المبيدات و البذور المسرطنة و عودة الإقطاع من جديد عبر امتلاك البعض لآلاف الأفدنة في طريق القاهرة الإسكندرية الصحراوي .

أنت مع الخصخصة ؟
لا طبعا مش ضد الخصخصة .. لكن الخصخصة اللي أنا أفهمها هي بيع شركات خسرانة لمستثمرين مصريين علشان تكسب ، ودي محتاجة في البداية تخطيط وحياد من أجهزة الدولة للتأكد من خسارة الشركات دي وثانيا ان تكون الأولوية لمستثمرين مصريين مخلصين وجادين بدل اللعب اللي بيحصل في المزادات و المناقصات بتاع الشركات دي ، ثالثا إنها تكسب بعد كده ونتأكد من كونها بتكسب
لكن اللي أنا شايفه ده عملية بيع لمصر
عقبال ما يخصخصوا الهرم الأكبر

هل أنت مع قطع العلاقة مع إسرائيل ؟
أنا ضد تطبيع العلاقات مع تلك الدولة المزعومة إسرائيل ، لكن مش مع قطع العلاقات ، أنا عارف إن مجرد مفاوضتنا معاهم يعد اعتراف ضمني بيهم لكن لازم يكون لينا قنوات للاتصال علشان نسوي الأمور المتعلقة بالحدود المصرية أو بما يتصل بفلسطين و قضايا الحكومة الفلسطينية و اللائجين لازم يكون لينا علاقات .. للأسف طبعا ، لكن طبعا مش ننام على كده لازم نسعى إننا نكون الطرف الأقوى ساعتها بس نقدر بالقوة نجبرهم على تنفيذ ما نريد أو نشيلهم نرميهم في البحر .. بلاش البحر .. هو السمك ذنبه إيه ؟

وما يترتب عليه من معاملة العدو هل تؤيد الحرب على العراق ؟
لا طبعا لا أؤيد الحرب على العراق لانها ليست هدفا لهم بقدر ما هي وسيلة لبداية عهد جديد في تاريخ العلاقات مع الولايات المتحدة التي كانت تسعى باحتلالها العراق ان يكون رأس حربة لعملية تغيير واسعة للأنظمة العربية بابعادها السياسية و الاقتصادية و الاجتماعية و الثقافية ، كنا سنكون الهدف التالي عاجلا أو آجلا و كما كشفته تقارير المخابرات الامريكية و التي وضعت خطة لاحتلا دول عربية وتركت مصر في ذيل القائمة قائلة :
Egypt is a fruit

هل تؤيد مرور الأمريكان في القناة ؟
طبعا
مرور السفن التجارية لا يمكن الاختلاف عليه طبعا لانه بتحكمه اتفاقيات
أما السفن العسكرية وخاصة مع علمنا بهدفها و الى اين ستذهب و من ستقتل فلا يمكن ان تكون للاتفاقيات اولوية في قرار مصر
وساعتها ممكن أقول اني ارفض تماما و لا أؤيد مرور الامريكان في القناة .

هل أنت مشترك في مؤامرة كسر فرنسا هانم بالاشتراك مع أم دنوه ؟
المنطلق الفكري بتاعي في حل السؤال ده لازم ينبع من احساسي المنعكس بالالتزام بقضايا معاصرة إللي هيا دراع فرنسا هانم وما حدش يسألني عن أي كلمة لأني مش فاهم أي حاجة
طبعا يا فرنسا طالما قلت دراع فرنسا أبقى بأتكلم صح ههههههه
فغلشان كده وعملا بالقاعدة الأصولية الهامة في قانون العقوبات و كافة التشريعات الجنائية أو الجنح و التي يندرج تحتها كسر دراع فرنسا هانم وتقول القاعدة :
أن البينة على من أدعى ، و اليمين على من أنكر
فعلى من يسألني هذا السؤال ان يقيم البينة لتكتمل ركائز دعواه أما أنا منكر هذه التهمة و المستنكر منها فلا أملك وفقا لتلك القاعدة إلا أن أقول و بعد والله العظيم أقول الحق :
وحياة الأخوة ما اشتركت في المؤامرة الرخيصة لكسر فرنسا هانم بالاشتراك مع أم دبوه و لا أم دنوه .

بتمرر التاج ده لمين ؟
التاج .. تاج إيه ؟؟؟؟

أنا التاج الأول كان جايلي من دودو لكن لما عرفت ان التاجات دي ميد إن الصباغ ، ولقيته باعت التاجات دي لجمهورية المدونين كلها ما عدا انا فمافيش داعي اني ابعته لحد معين

لكن بامرر التاج ده لأي واحد ما يلاقيش اسمه ضمن من مرر لهم الصباغ التاج و أي حد يرغب في الاجابة على هذه الأسئلة و يدخل مجلس الشعب من أوسع أبوابه ليمارس الآليات البرلمانية بشقيها التشريعي و الرقابي .. حتى لو كان في التاج و بس ههههههه

هناك 26 تعليقًا:

  1. السلام عليكم


    احلي حاجه ان ماليش في التاج


    النتيجه ظهرت صحيح؟
    ولو ظهرت عملت ايه؟

    ردحذف
  2. اولا عايزة بس اقولك ان انا بجد حصلى الشرف لمرورك عندى فى المدونة بتاعتى ...وبجد تنورنى فى اى وقت

    ردودك واجاباتك على كل سؤال بتنم عن تفكير سليم ..واسلوب بجد عجبنى كتير

    وربنا يهدى اللى بالى بالك يارب ...عشان البلد مش هاتستحمل اكتر من كدة

    حرااااام اوى يعنى



    تحياتى


    وياريت تقبل اقامتى اللى هاتكون دايمة ان شاء الله هنا اول ما ارجع للأراضى المصرية بإذن الله



    :)

    ردحذف
  3. انا مجاليش التاج خالص لاكن مش عايزه لانى مش عايز ادخل مجلس الشعب لانى مبحبوش من ايام ما كنت فى ابتدائى عشان كان ساعات يلغى مسلسل الساعه 7 وربع

    ردحذف
  4. السلام عليكم ورحمة الله وبركاتة

    أزيك يا أحمد
    والله التاج جه فى محلو بما انو حضرتك خريج علوم سياسية سابقا قحضرتك من الأشخاص اللى يمكنها الاجابة عليه

    ما اعتقدش انو ممكن اى حد يجاوب على التاج دا

    ولكن عجبتنى معظم الأجابات اللى قريتها

    وعلى فكره انا من أشد المعارضين على حكاية الحصانة دى لانو ماينفعش يكون فى حد فوق القانون

    والصراحة انا عمرى ما تمنيت او حتى تخيلت انى اكون عضوة فى مجلس الشعب وأفضل انى أخدم ولاد بلدى بطريقتى الخاصة

    لانو الأعضاء للاسف لا بيهشو ولا بينشو لسبب بسيط لانو المجلس دا كلو شكليات لانو لو كان مجلس بصحيح كان على الاقل ليه الحق فى محاسبة الوزراء الحرامية

    يلا يارب البلد تنظف بقة

    بس عارف ايه اكتر حاجة عجبتنى انك كنت امين يعنى .... مش عارفة اقولها ازاى

    انا قصدى انو انت كنت ممكن تطنش وما تعلقش خامس واحد وماتخدش التاج
    فهمت قصدى ؟
    وأخيرا
    بتحبو ميييييين.... الطاجن
    تنتخبو مييييين.... الطاجن

    هههههههه عجبنى الرمز اوى
    أختك توكا

    ردحذف
  5. مبروك عليك التاج يا احمد
    بس يا راجل حتى مخدش منك فص على العموم شكرا
    واجابتك جميله تنم عن اقتصاد وعلوم سياسيه فعلا
    بس بجد وانا بقرا السؤال بتاع كسر فرنسا هانم مفيهمتش حاجه خالص
    وعجبنى قوى طلب الاحاطه بجد برافو عليك بس مين يسمع ومين يشوف
    تحياتى ولاء

    ردحذف
  6. احيانا بيبقى التاج جميل لكن اللى بيجمله اكتر اجاباته و انتى اجاباتك مميزة جدا

    تحياتى

    ردحذف
  7. mohand
    -----------
    النتيجة لسه ما ظهرتش اصل التمهيدي ممكن يكون بيتأخر شوية لكن ما اظنش ان حتى الكلية شكرا على التعليق رم انك بتقول ان مالكش في التاج

    oceaneyes
    -------------
    إقامة كاملة .. يا خبر .. بس كده دا انتي تنوري ، شكرا على تعليقك اللطيف

    صوت من مصر
    ------------
    لو جات على ان مجلس الشعب يكون ضرره الوحيد الغاء مسلسل الساعة سبعة و نص دا كان يبقى كويس ، ربنا يستر
    ههههههههههه

    ردحذف
  8. احمد يارب تكون بخير
    ترجع بالسلامة بإذن الرحمن من امانة الشباب
    شايفة مهند بيقلك النتيجة
    ربنا يوفقك يارب ..ابقي طمني بإذن الله
    ...
    ملقتش غير طاجن مكرونة يااحمد انا كده جعت اوي
    بس انت فكرتني بحكاية تلبيس السلطانية
    انت شكلك هتلبسنا السلطانية لو بقيت عضو في المجلس
    .......
    استجواب للعادلي في محله الحقيقة انا مش عاوزة استجوبه انا عاوزة اشيله من مكانه ربنا يرحمنا من الي بيعملوه في الشباب الي بيتبهدل في الاقسام والتعذيب
    انا معاك طبعا في عدم التطبيع ومعاك في مرور السفن الامريكية
    ...
    اجابتك جامدة واحلي حاجة اللزقة الانجليزي والله فعلا المفروض الي يمسك منصب ميسبهوش في البلد دي
    بس صحيح قلي ايه هي اللزقة الانجليزي دي؟
    انا اسمع عنها بس معرفهاش
    احمد ممكن لو بقيت عضو ارشيك وتديني منصب معاك؟؟؟هههههه
    بلييييز خد فيا ثواب
    يلا صباح الخير يااحمد
    الله حافظ
    دودو

    ردحذف
  9. انا كان نفسي اجاوب علي التاج بس احم عاوزة دعوة رسمية منك عشان
    انا بنكسف
    :)

    ردحذف
  10. صباح الخير يااحلي احمد
    اولا هقلك جملة واحدة
    لو كل حاجة في الدنيا نتمناها تيجي بنفس سرعة ردك عليا
    يبقي كده اقدر اقول الدنيا حلوة
    شكرا لتمريرك التاج ايوه كده احب انا الطلبات الرسمية
    ...
    اسمع اوعي تكون زعلان من الصباغ ده ياعيني عنده كمية زوار رهيبة والناس الي يعرفها كتير اكيد نسي من غير قصد
    ..
    وبعدين هو مش كفاية انا ولا ايه؟
    ...
    شكرا علي الطاجن بس ناقص ملح
    ربنا يوفقك يااحمد
    دودو

    ردحذف
  11. والله انت شكلك فاهم يا نصة

    فعلا حسيت ان دمك خفيف و فاهم في نفس زات تحديد الوقت

    وعجبتني ردودك كلها تقريبا والله

    تحياتي
    ادم

    ردحذف
  12. جامدة اجابابتك يا موجة
    بحب اقولك كده مليش دعوة
    الحمد لله انا نفدت من تحت ايدك المره دى:)
    انا فعلا التاجين دول جاوبتهم
    شكرا يا ريس

    ردحذف
  13. السلام عليكم ورحمة الله وبركاته

    ايه الحكايه هو انهارده اليوم العالمي للتاجات ، كل ما ادخل مدونه الاقي تاج واتنين
    دا البلوجر كلهم بقوا سلاطين وملوكوماعدش حد هايعرف يكلمهم
    :-D

    ردحذف
  14. ToOoKa
    ---------
    شكرا لتعليقك الظريف اللطيف على التاج طبعا ممكن الواحد يخدم اهله و دايرته من اي منصب لكن طبعا عضوية المجلس دي حاجة تانية برضه وممكن اخدم افضل من خلاله
    و الطاجن عمره ما حيخدعكم أو يخمكم
    الطاجن ده في النهاية .. ابنكم
    ههههههههههههه

    ردحذف
  15. ToOoKa
    ---------
    شكرا لتعليقك الظريف اللطيف على التاج طبعا ممكن الواحد يخدم اهله و دايرته من اي منصب لكن طبعا عضوية المجلس دي حاجة تانية برضه وممكن اخدم افضل من خلاله
    و الطاجن عمره ما حيخدعكم أو يخمكم
    الطاجن ده في النهاية .. ابنكم
    ههههههههههههه

    ردحذف
  16. سلامو عليكو

    أخي في التدوين موجة
    أشكرك على تمرير التاج
    ثم أشكرك علي متابعتك لتاجي في مدونتي
    و لكني و بحق و بدون أي كذب
    لن أستطيع أن أجيب عن كل هذه الأسئلة التي ستتعبني فكريا و تثير اكتئابي الكامن من البلد و حالها
    عزيزي موجة اعذرني بشدة
    و مدونتي تتشرف باستقبالك و تفرح لذلك

    مصطفي محمد

    ردحذف
  17. walaa
    -----------
    ازاي يا ولاء انا باهدي التاج و بمرره لكل من لم يصله من الصباغ ، شكرا على تعليقك يا ولاء

    ردحذف
  18. محمد ياسر
    -----------
    ربنا يكرمك يا محمد حقيقي ذوق ، بعد ما عندكم يا باشا

    ردحذف
  19. Vague
    ---------
    شكرا يا معلللللم
    هههههههه
    منزر يا ادم و الله تعليقك المرادي واضح عن تعليق البوست اللي فات
    بس عموما
    زيارتك بتشرفني

    ردحذف
  20. لماضة
    ---------
    عموما انا راجع اشوف اجابتهم عندك باذن الله .. ونشوف يا ستي

    ردحذف
  21. مصطفى محمد
    ---------------
    منور يا مصطفى و اللله يا باشا كفايا زيارتك دي ، ربنا ما يحرمنا من دخلتك علينا هههههههههههه

    ردحذف
  22. صباح الخير يااحمد
    احمد انا جاوبت التاج ادخل شوفه وقلي تعليقك ايا كان
    بس احتملني اصل اجاباتي بعضها طويل حبتين
    يومك وردي يارب
    دودو

    ردحذف
  23. موجة شكرا لرأيك
    انا كتبت التعليق ده عندي بس بعته لك عشان مهتمة ان اتناقش وياك
    :))
    الحقيقة انا اخترت الامين العام لسبب
    انه المسؤول عن نزاهة الحزب المفروض يعني هقعد جنبه عشان اناقشه في تجاوزات الاعضاء
    وبعدين ما انا طردته من جنبي انت نسيت؟
    :)))))
    سنو وايت اه عارفة قصة المراية انا بحب الحاجات دي برضه اوي ومين مش بيحبها
    ...
    شكرا يااحمد

    ردحذف
  24. بما انك قلت دراع فرنسا يبقى بتتكلم صح
    زى ما قال سعيد صالح فى المشاغبين
    مدام قال دراع مرسى يبقى بيتكلم صح
    تحياتى
    وتحياتى مره اخرى على ردودك الجميله على التاج

    ردحذف
  25. العزيز احمد

    يا عم ديه اجابات جامدة الواحد ميقدرش ينافسها
    وخصوصا انك بتكلم مع خلفية واضحة لاجاباتك

    على العموم عجبيتى اوى الاجابات

    ومعلش بقى حظك معايا انك اتكعبلت فيه
    وتعيش وتاخد غيرها
    ويارب دايما اشوفك منورنى

    ردحذف
  26. فرنسا هانم
    --------------
    منوراني ومشرفاني و الله بزيارتك و تعليقك
    ومادام قال دراع فرنسا يبقى بيتكلم صح
    ههههههههههه
    ربنا يحفظك


    aya
    ---------
    ربنا يكرمك يا آية
    مشرفاني بزيارتك و تعليقك الكريم

    ردحذف

Related Posts Plugin for WordPress, Blogger...