إقفل بقك بالترباس

قصيدتي حول براءة مبارك من التهم المنسوبة إليه :

إقفل بقك بالترباس..

واقتل جواك الإحساس..

أصل الريس راجع تاني..

وقرر يحبس كل الناس..

مهما حصلك..

اقفل بقك بالترباس..

وإوعى تقولي :

أنا دقت الفقر .. ودقت الجهل..

إوعى تقولي دخلت القسم..

سمعت شتيمة تمس الأهل..

مهما حصلك..

إقفل بقك بالترباس..

إوعى تفكر تدعي عليه..

حسك عينك تشتم فيه..

أو تتهمه بإنه حرامي .. وصاحب كاس..

علشان كام مليار في رصيده ..

يبقى حرامي ؟

علشان رزق عيالنا في إيده ..

يبقى حرامي ؟

علشان باع الغاز والأرض..

وغمض عينه .. فراح العرض.. 

يبقى حرامي ؟

علشان دخل المنصب حافي..

وخرج إمبارح لابس جزمة..

يبقى حرامي ؟

إقفل بقك بالترباس..

إوعى تفكر تكتب قصة .. وترسم رسمة..

إوعى تفكر تنطق كلمة .. مالهاش لازمة..

أصل الريس .. راجع تاني..

وقرر يحبس كل الناس..

قرر يثبت إن حياته ..

وهبها لشعبه..

وإنه ماكانش في لحظة أناني..

قرر يثبت إن بطانته..

سر متاعبه..

وإنه ماكانش في يوم الجاني..

قرر يسجن كل مواطن شتمه وهانه..

إقفل بقك بالترباس..

وإوعى تقول : ريسنا حرامي.. 

ماهو لو دخل المنصب حافي..

وخرج إمبارح لابس جزمة..

ليه ماتقولش عليه ببساطة.. أو بعباطة

إنه عصامي.